اهلا وسهلا بكل حدا متابعنا على Tech Jo Hub. اليوم بدنا نحكي بموضوع شاغل بال نص الشعب الأردني: بدي آيفون بس الميزانية ما بتجيب جديد. الكل بركض ورا المستعمل، بس السوق مليان أجهزة مجمعة و مضروبة وبتتغلف بكراتين جديدة وبتباع على أساس أنها نظيفة.
عشان هيك، قررنا نعملك هالدليل الدسم، اللي بخليك تدخل على أي محل موبايلات بالجاردنز أو بوسط البلد وأنت فاهم وما حدا بقدر يمشّي عليك جهاز مضروب.
أولاً: شو يعني مستعمل بالأردن؟ (لازم تميز)
قبل ما تطلع من البيت، لازم تعرف إنك رح تسمع مصطلحات بتدوّخ. في عندك:
المستعمل النظيف (Open Box): هاد بكون واحد اشتراه واستخدمه أسبوع ورجعه، أو ما عجبوا اللون. هاد لقطة بس سعره بكون قريب من الجديد.
المستعمل العادي: جهاز اشتغل سنة أو سنتين، هون الشطارة بالفحص.
المجدد (Refurbished): إذا كان بكرتونة أبل البيضاء، فهو ممتاز. إذا كان تجديد محلي، يعني شاشة مغيره وبطارية صينية، ابعد عنه قد ما تقدر.
ثانياً: فحص النية قبل فحص الجهاز
أول قاعدة: إذا شفت السعر “لقطة” ومحروق بزيادة عن سوق الأردن، اعرف إنه في النا بالموضوع. الآيفون بيمسك سعره، وما في تاجر ببيع بخسارة إلا إذا الجهاز فيه علّة مخفية أو مصلّح بقطع تجارية.
ثالثاً: غرفة العمليات … كيف تفحص الجهاز بإيدك؟
لما تمسك الموبايل، لا تنبهر بالنظافة الخارجية، اتبع الخطوات هاي بالحرف:
سر حرف الـ (M) والـ (F): ادخل على الإعدادات > عام > حول. شوف رقم النموذج.
إذا ببدأ بحرف M: الجهاز أصلي وجديد من المصنع.
إذا ببدأ بحرف F: الجهاز “مجدد” من أبل (Refurbished).
إذا ببدأ بحرف N: الجهاز تم استبداله من الشركة بسبب عطل سابق.
فحص الشاشة والـ True Tone: اسحب البرداية او سميها زي ما بدك 😁😁 الإشعارات واضغط بقوة على السطوع. إذا مش موجود خيار (True Tone)، يعني الشاشة مغيره بـ 100%. حتى لو التاجر حكالك تحديث سوفتوير، لا تصدقه. الشاشة الأصلية غالية ومستحيل حدا يركبها ويبيع الجهاز برخيص.
البطارية.. فخ الـ 100%: بالأردن، أغلب الأجهزة المستعملة اللي موديلها صارله سنتين (زي آيفون 13 و 14) مستحيل تكون بطاريتها 100%. إذا لقيتها هيك، فغالباً البطارية مغيره أو مرفوعة عن طريق وصلة خارجية. النسبة الطبيعية للمستعمل النظيف بتكون بين 87% و 92%.
فحص الـ Face ID: هاد أهم قطعة بالآيفون. إذا خربت، تصليحها صعب ومكلف وممكن ما ترجع زي أول. جرب تفعل بصمة الوجه بنفسك وتأكد إنها سريعة.
رابعاً: “تشييك” الـ IMEI والضمان
اطلب من التاجر كرتونة الجهاز. افتح المتصفح وادخل على موقع Apple Check Coverage، ودخل الرقم التسلسلي.
تأكد إنه اللون والسعة اللي على الشاشة نفس اللي بالكرتونة ونفس اللي بإيدك.
بالأردن، تأكد إذا الجهاز عليه كفالة محلية زي (BCI) أو (iSystem) أو (أورانج/زين)، لأنها بتعطي قيمة للجهاز عند إعادة البيع.
خامساً: موضوع الأقساط والشبكات
في أجهزة بتدخل الأردن بتكون مs;vm على شركات اتصالات برh، أو أجهزة مسحوبة أقساط وما اندفع حقها. جرب شريحتك (زين أو أمنية أو أورانج)، وتأكد إنها لقطت (4G/5G) وعملت مكالمة بوضوح. تأكد كمان إنه الـ iCloud مسجل خروج منه تماماً.
سادساً: نصيحة ابن بلد قبل ما تشتري
لا تشتري من الشارع: اشتري من محل معروف واله اسم، وخذ وصل استلام مكتوب عليه رقم الـ IMEI وفترة تجربة كفالة محل لا تقل عن 3 أيام.
افحص الكاميرات: جرب الكاميرا وصوّر فيديو وسجل صوت. مرات بكون في غبرة جوا العدسات بتبين بالتصوير بس.
السماعات: شغل أغنية وعلي الصوت لآخر شي، تأكد إنه ما في خشخشة بالصوت.
خلاصة الحكي اللي فوق:
سوق المستعمل بالأردن فيه صيد ثمين وفيه “خوازيق”. خليك صبور، لا تستعجل، وطبّق الخطوات اللي حكيناها بـ Tech Jo Hub. إذا شفت التاجر توتر وأنت بتفحص، اعرف إنه في شي مخبى.
